BARAKAT MU YA HABIBULLAH
Bismillah in hi una, sumunu’ in Alhamdulillah
Manusiya’ ha adlaw dunya nabaggut sin Kalimah
Dunya ha ahil jaman, indajinis kapandayan
Hinang bukun matuman, mahumu mahinang sukang
Tagnaan ta langkuun, Tampat in bissarahun
Awal daan paghinangun, bukun hat hainduun
Habib Munzir pilihan, ha bissara matuman
Bang bawgbug kamaasan kanila panghanglaan
Ha Qur’an makahapal, ayaw maghawal-hawal
Sarah hukum matampal, dum adlaw diyaragayray
Panubu’ sin Rasulullah, Habib in gulal kaniya
Ha Yaman nagmadrasah, awal daing ha Indonesia
Hilatun pa kabtangan, Istigatha in ngan
In tungud kamaksuran magpangayu’ ha patay tabang
Jiyari pangayuan, ha Tampat kaMu’minan
Ayaw maghaman-haman sila kakasih sin Tuhan
Hipatay kay buhi’ dayaw sibu’ way sali’
Daak ha tau patay, biya’ da ha tau buhi’
Ay himinang pagbiddaan ha buhi’ kay marihang
Manfaat iban Mudarat,Tuhan in tagbayaan
Hisiyu-siyu magpabidda’, Kakupulan yan nyata’
Kawasa sin Maha Assa way lugal, tampat niya
In paggawi pa Tampat sin tau mabarakat
Misan kaw maghajat, Tuhan in tagkaramat
Bang ibarat ha dunya in pangayuun pisita
Bang ha alam ahira karayawan nila in mahampit ta
Habib Munzir nagdalil hadis sin Nabi piyalahil
Umbul 1405 ha Sahi Bukhari kiyanukil
In Junjungan Rasulullah jimari hapagIstigatha
Bang kamu Ahlu Sunna hatiha ini parayawa
“Sabunnal tuud sumuuk in suga ha adlaw Qiyamat sambil in hulas tumubtub tunga’ sin taynga, Iban ha masa sila bihadtu kahalan nagIstigatha sila [Timag sin kangan-nganan iban maksud mangayu’ tabang] pa Nabi Adam, ampa sila nag-Istigatha pa Nabi Musa, Isa sambil in katan yadtu dih makahinang unu-unu, ampa sila nagIstigatha pa Nabi Muhammad SAW” [Tuput Tunggal Junjungan in jiyari Pag-Istigatha han ha adlaw ahirat]
In hadis kaibanan ha Sahi Muslim kabaakan
Ayaw masa’ paham, bukun ini hinang-hinang
Ha masa sin Nabi Adam nakanaug pa Dunya
Pa Nabi Junjungan Nagistigatha ampa nalappas daing ha Dusa
Ampa in Nabi Junjungan wala’ nanirik ha hinang yan
Sambil pa manga Habaib simingud da himinang
Ha hambuuk riwayat, sanad Hassan in darajat
Hi Imam Tabrani, Imam Hakim iban Ibn Sunniy nagmawpakkat
“Ha unahan sin Ibn Abbas RA awn hambuuk tau simakit in siki [in sakit hantang bula-bula] niya, ampa namung in Ibn Abbas kaniya, sabbut kaw ngan sin tau landu’ mu kalasahan..! Ampa timilahak in tau yadtu namung..: Muhammad..! Daing ha sabab yadtu hangkaraih paman naig in sakit sin siki niya. [In riwayat ini kiya riwayat da isab sin Imam Nawawi iban hi Aladzkar.
Kamusrik wala di, bang hakasigpitan maglagi
Ibn Abbas RA namaytai bukun yan ari-ari
Hilatun pa bihaun, Tsunami ha Aceh naawn
Masjid maas iban Makam sin Salihin, Nalappas daing ha Alun
Mahadjana taga sasakatan nagparagan pa kaburan
Nahansul dakatan, puas sin dimagan paka Tampatan
Bukun pabaha yan Tanda’, Ad biyutang ha tampat way makakita’
Biya’ da kita sin biyaytaan, in Iypun niya salihin piyapalihala’
In pangasubu mayta’ hinang sin Tuhan pagsasalamatan in manga makam?
Mayta’ bukun ha tau buhi’, mayta’ bukun ha Bud, Mayta’ bukun ha bay mataas?
In jawab niya, in Allah SWT nanghindui katu’ papagistigatha hun ha tau Salihin.
Magsukul pa katan, namassa ha tiranan
Nasihat ini pasampayan, bat malawa’ pagduwa-ruwa ha hinang sin kamaasan
Bissara tambulun na, Magpalabi kami di’ na
Magtuntut Ilmu’ ayaw siya siyaha bat di’ maluppas ha dunya sambil pa ahira
 |
| Habib Munzir Al-Musawa |
In nagbaktul sin Tarasul: Yazir Rajim
10:38 PM
5 April 2011
------------------------------------------------------------------
Awn ulangig mahibuk
Nagdara bayta’
Liyuluunan pangdusta’
Hikatambul pangita’
Hikahilu paghula’
Awn suwara maluuy
Hikatutug ha taas baluy
Hikaladju pikilan
Hikabali’ pangatayan
Awn kalangan ligaw-ligaw
Naghahambin kahukaw
Kasusuban sin kabataan
Hawnu-hawnu binaybayan
Awn lugu’ makasawasa’
Makahugut pamaratsaya
Makalanu’ pangatayan
Makahansul ha syaitan
Yazir Rajim
11:35 am
05 January 2009
Sandakan
LINGKAT DI' MAGBALUBA
Iyanduk-anduk ku in U namassa sin bahana'
Dimumul laud, imatud pa bud, himangad pa Langit
Imatud pa ginhawa, himanggit pa laum pa guwa'
Nag-nyata'! Misan hangka insis wala' nila nahalin in lingkat mu
Awal kajari maraw in kapahantang
Piyalahil in katan langkap sin kajinisan
Bud, Sapa, Laud, lamud in kakayaw kayawan
Hiklad pa Tausug in hula' Sulu hula' haka pu-an
Pu' sibi'-sibi aturun daing ha taas gumi
Ha lingkat niya kulang na nagparuli
Mahadjana' nahiyul nagkadtu kari
Hula' nila piyasaran tiyukbal pa Nasrani?
Ibut! mabunsi tuud sila sabbutan hayan
Hikapamunu' nila bang mu daranan
Hakalahil muparrik nagtatamung saytan
Ilaw sawasa' nalarut na daing ha baran
Kuppiya, Turung, sulban lilibud ha U
Tanda' hakalahil wala' kita napissuku'
Magunu naman dumaut kapatut hipagasag dugu'
In hula' Sulu awal daan katu'
Ayaw hadja magbansag in tau panday pandikal
Bang in luun pamikil luwal magparupang ha tau Amanillah
Indalupa prugram bang hasaum iluk nila ra
Balik na hadja kaw pa bayta' sin Qur'an, igan in pagduwa-ruwa
Lahawla Wala Quwwata Illah Billah
Sanjata sin mu'min makusug daing ha Amerika!
Sung niyu na kalupahan in pyagdayaw sin kamaasan
Imatubang pa Kastila, Milikan, Jipun iban Filipino ha hula' kalasahan!
Bukun pa baha' mamarahi, in kabinsanaan piyananam sin nagpapanjari?
Sumuksuk naman kaw pa saum Iluk, magguwa' sin kapandayan
magbaktul sin indajinis prugram, tumabang ha pamarinta maghukut sin bangsa
Nakapakain na in Martabbat kiyabin kaymu sin kamaas-maasan?
Halul akkal bayan buddiman! Kiyaingatan niyu, nabassa niyu,
Mayta' kamu malisu' na, pa hinang hikasanyang sin kaapu'-apuan
Di' baha' kamu mahukum dayyus? Di' baha' kamu mahukum munafik?
Nagpipikil sin hula', sah ha Satru' dakamu nagmalilla'!
Ingata...in lingkat sin hula' Sultaniyah sin Sulu
Magkumbatul da ha bigi jantung sin kaanakan, sin kaapuan
Bang adlaw ini malukbu' in manga Mujahidin hapagpalindugan
Kunsum yanda sila magjaga ha lingkat sin Sulu di' Magbaluba...
Yazir Rajim
4 April 2011
12:39 PM, Sandakan
-------------------------------
INA' KU
In Lima mu simahaya nagpandu' kamu'
In Bayhu' mo simi’nag ha kabuhi namu'
In Uyum mo ina' ku nagpasanyang kamu'
Malasa kami landu’ kaymu ina' ku
In Lima mu simahaya nagpandu' kamu'
In Bayhu' mo simi’nag ha kabuhi namu'
In Uyum mo ina' ku nagpasanyang kamu'
Malasa kami landu’ kaymu ina' ku
By Khalid Ismael
-------------------------
AWLIYA'
In Awliya' Bahasa
Lambung siya sin Allah
Hati niya Sahaya
Pa ahirat pa dunya
In siya Limaya
By Tausug Kaapuan
"TAZKIYYAH"
Qad aflaha man tazakka! NagFarman in Tuhan Allah,
Paruntungan na in nagSuchi sin ginhawa baran niya.
In ini pahanugun Niya katu di hipa siyasiya,
Pabaugbugan in damikkiyan sarta’ sin ammal nya,
Supaya mapusu’ taniyu in paruntungan sin Dunya iban Akhira.
Ibut in maksud ku bukun ha ilmu’ magbakaybakay,
Atawa muhung kabantugan dain ha bagaybagay.
Sumagawa’ ini kawajiban pa mga taymanghud hipa sampay,
misan tunistunis sajja ha pais babaw babaw,
di da kita maglilay tuud iban magdagayray,
urulun ta mayan hi apah tuwan ha masjid atawa ha bay
Lilay sin manga kamaumaasan natu’ iban sin mga kaguruhan,
Bang biya’diin in Kasuchihan na bankil ha laum sin Qur’an.
In agi nila na bahagi siya pa-tu (3) Ginisan
Halaum kuno sin tu(3) ini in hangka ginis hakatampalan,
Adapun in duwa (2) ha laum ka rahasiya’an.
Nah, munamuna Kasuchihan sin Jasad Badan,
Dain ha Najis iban Junub mabu’gat iban magaan.
Wala kita sin Allah Ar-Rahman Piya saran,
dihilan kita tubig dain ha lupa iban dain ha ayan.
Sarat hikatayma sin Allah ha ibadat iban sambahayang,
Supaya ra isab kita mahamut malanu ha mairan.
Aniban ta in pagkaun Haram iban tiyakawan.
gandariba magpa anak siyn subay taykuran,
bat in jasad salamat dain ha sakit iban kalammahan.
iban in panubu anak apu’ ta jatu iban barkanan,
bilang dain manga nangangaku ipun pa Tuhan Ar-Rahman.
Nah, hikaduwa kasuchihan sin Nafs Ginhawa,
kunu’ in siya atas tu(3) daraja.
Nafs Ammara, Lawwama iban Mutma’inna.
Magsuchi dain ha manahut iban maaslag dusa,
Umanib ha ma’siat, magpataud sin ammal ibadah .
tattap in pagtawbat sin Tawbatan Nasuha.
Nafs Mutmainna abutan dakula paruntungan,
Tuyuan ta duum adlaw ammalan in mga pyangdaakan.
kaagi magtikang pataas sumakat hagdan.
ingata, Luwas lungsad nagtatagad ha gi’tungan.
Hangkan sarta’ sin Kasabar inut-inut ha mga lambang.
Manjari lumatun kita pa hikatu palbahagian,
Siya na in pagnganan magsuchi sin Pangatayan.
Suchihun ta lanuan dain ha mga sifat kangian,
Ampata ta gantian sin mga sifat sin karayawan.
Bang malanu salamat in pangatayan,
Lapay salamat in anggawta’ baran.
Damikkiyan lumingkat mahamut in pangaddatan,
na’ bang siya kumangi iban kalummian,
lapay ra isab lumummi’ in anggawta’ baran,
magad mahalu in piil pangaddatan.
Dhikr, Qur'an iban duwaa dum adlaw tuyuan ta,
way waktu iban tampat in kita subay di malupa,
supaya salamat pangatayan malanu’ biya’ samin sawasa’.
pangatayan tamingan dain ha jangki, kibir iban suma'a
pasal in mga yan tamak dakula makalummi kaniya.
Apabila kita muwi pa Allah sartah sin pangatayan sawasa,,
wayna kahanggawan ta ha bahaya kubur iban bahaya Qiyama
Karna ha huli adlaw wayna magparungtungan ha hadarat Niya,
buwat malaingkan hi siyusiyu in nagdara sin pangatayan salama..
Adapun in tu(3) ini manjari sila hambuuk
manjari ra isab nagbubutas sah naka network
manusiya ha tu(3) ini duun siya natibuuk.
unuunu na kakahinang sin atay misan biya paukpuk,
ha laku tabiat siya tumampal misan biyah tauktuk
in mga nasabbut ini subay ta anaran pagtuyuan
supaya ta madawhat in lasa iban rida sin Allah Tuhan
sa lugay ha kabuhi ta in mga ini subay pagtuyuan
ingatun ta isbatun bat kaammalan.
kalu ra man inshaAllah in kita mabilang,,
dain ha mga sila Auliya ArRahman.
By Raux
Qad aflaha man tazakka! NagFarman in Tuhan Allah,
Paruntungan na in nagSuchi sin ginhawa baran niya.
In ini pahanugun Niya katu di hipa siyasiya,
Pabaugbugan in damikkiyan sarta’ sin ammal nya,
Supaya mapusu’ taniyu in paruntungan sin Dunya iban Akhira.
Ibut in maksud ku bukun ha ilmu’ magbakaybakay,
Atawa muhung kabantugan dain ha bagaybagay.
Sumagawa’ ini kawajiban pa mga taymanghud hipa sampay,
misan tunistunis sajja ha pais babaw babaw,
di da kita maglilay tuud iban magdagayray,
urulun ta mayan hi apah tuwan ha masjid atawa ha bay
Lilay sin manga kamaumaasan natu’ iban sin mga kaguruhan,
Bang biya’diin in Kasuchihan na bankil ha laum sin Qur’an.
In agi nila na bahagi siya pa-tu (3) Ginisan
Halaum kuno sin tu(3) ini in hangka ginis hakatampalan,
Adapun in duwa (2) ha laum ka rahasiya’an.
Nah, munamuna Kasuchihan sin Jasad Badan,
Dain ha Najis iban Junub mabu’gat iban magaan.
Wala kita sin Allah Ar-Rahman Piya saran,
dihilan kita tubig dain ha lupa iban dain ha ayan.
Sarat hikatayma sin Allah ha ibadat iban sambahayang,
Supaya ra isab kita mahamut malanu ha mairan.
Aniban ta in pagkaun Haram iban tiyakawan.
gandariba magpa anak siyn subay taykuran,
bat in jasad salamat dain ha sakit iban kalammahan.
iban in panubu anak apu’ ta jatu iban barkanan,
bilang dain manga nangangaku ipun pa Tuhan Ar-Rahman.
Nah, hikaduwa kasuchihan sin Nafs Ginhawa,
kunu’ in siya atas tu(3) daraja.
Nafs Ammara, Lawwama iban Mutma’inna.
Magsuchi dain ha manahut iban maaslag dusa,
Umanib ha ma’siat, magpataud sin ammal ibadah .
tattap in pagtawbat sin Tawbatan Nasuha.
Nafs Mutmainna abutan dakula paruntungan,
Tuyuan ta duum adlaw ammalan in mga pyangdaakan.
kaagi magtikang pataas sumakat hagdan.
ingata, Luwas lungsad nagtatagad ha gi’tungan.
Hangkan sarta’ sin Kasabar inut-inut ha mga lambang.
Manjari lumatun kita pa hikatu palbahagian,
Siya na in pagnganan magsuchi sin Pangatayan.
Suchihun ta lanuan dain ha mga sifat kangian,
Ampata ta gantian sin mga sifat sin karayawan.
Bang malanu salamat in pangatayan,
Lapay salamat in anggawta’ baran.
Damikkiyan lumingkat mahamut in pangaddatan,
na’ bang siya kumangi iban kalummian,
lapay ra isab lumummi’ in anggawta’ baran,
magad mahalu in piil pangaddatan.
Dhikr, Qur'an iban duwaa dum adlaw tuyuan ta,
way waktu iban tampat in kita subay di malupa,
supaya salamat pangatayan malanu’ biya’ samin sawasa’.
pangatayan tamingan dain ha jangki, kibir iban suma'a
pasal in mga yan tamak dakula makalummi kaniya.
Apabila kita muwi pa Allah sartah sin pangatayan sawasa,,
wayna kahanggawan ta ha bahaya kubur iban bahaya Qiyama
Karna ha huli adlaw wayna magparungtungan ha hadarat Niya,
buwat malaingkan hi siyusiyu in nagdara sin pangatayan salama..
Adapun in tu(3) ini manjari sila hambuuk
manjari ra isab nagbubutas sah naka network
manusiya ha tu(3) ini duun siya natibuuk.
unuunu na kakahinang sin atay misan biya paukpuk,
ha laku tabiat siya tumampal misan biyah tauktuk
in mga nasabbut ini subay ta anaran pagtuyuan
supaya ta madawhat in lasa iban rida sin Allah Tuhan
sa lugay ha kabuhi ta in mga ini subay pagtuyuan
ingatun ta isbatun bat kaammalan.
kalu ra man inshaAllah in kita mabilang,,
dain ha mga sila Auliya ArRahman.
By Raux
Dec. 2010
KSA
KSA
