"NA LASSUN NA SiN MUSIC"

Wednesday, May 11, 2011

{TARASUL BAHASA}

Bismillahir Rahmanir Rahim

In mga Kabataan , na lassun na sin Music yan.
Sambil naba mga kamaasan , sapsayun kuna katan :-)
peace!
mayta kaw Teeth mag paki-alam?!
kaku ini magpatumtum laung ta bihayan..
maksud in kumawa karayawan..
sambat mu kanya-kanyang TRIP lang yan!!
"SO wala sanang basagan" :-)

Amu ini in addat ha UMMAH kimugdan!
Bang patumtuman in MUSIC HARAM,
Sambung way ra miyagad in pangatayan,
Hat sadja kunu pikilan, in siya Kumalang- kalang
Sah sabda sin Rasulullah "Inna mal Ammalu Bin Niyah"
Hati sin Hadis sin Rasulullah
bang in ha pangatayan mu unu ka!
Amu ra in higuwa nia!! Sahih ini, ha Bukhari kalagan ta!

Basa way miyagad in pangatayan NILA!
Sah kitaa niyu mattu in purma,
Asubuha bang hisiyu in singuran niya
Dih san sabbutun in Rasulullah
sah magtuy kaw kum-kuman signal sin lima
tudlu’ iban king-king in piya-patindug nila
iban pag iyan kaymu "Rocker's Ba Kita!"
Sambung ko sab IKAW SADJA!

Awun isab yan mga kabataan
Bang mag kalang mag law-laksuhan
in ut sin paa bang mu kakitaan
Yuulinan atawa yaagpangan?!
In tamungun MAHALUY katan
iban saruk nila sung na matang-tang
in pag tawag kanila ha kawman
HIP-HOP daing ha SABAH katan!

in Nabi nila Hi 50 CENT
in Sahaba nila Black eyed Peas
Malasa sila kay EMINEM
Iban pag Signal nila PEACE!!!

Oh mga Muslim kabataan
In Fitna sin Music mahunit butanan
Sawab in Bunnal niya yan
Nakanat na in Music ha GINLUPAAN!.

Sabunnal in MUSIC tuud HARAM
Agi sin ALLAH ha Qur'an
Kitaa pa Surah LUQMAN (31:6)
Janji Sin ALLAH in IKAW!!!
MAG MU-MUSIC KASAKITAN!!!

Sah awun yan lumugat pa
In SLAP SHOCK kunu marayaw in hinang nila
Sawab pad pad kunuh in batah mag Druga
Marayaw in mag JAMMING na sadja
Anduh kailu in aku libaun pa
Mayta in mag BANDA IBADA?!
Bang in mag Banda hikarayaw siya
Adapun HINDU NA SIN RASULULLAH!!
Sah matampal in Hinang ini PIYANGLANGAN SIYA!
Bang kaw ISLAM DA IN AGAMA,
Anduh MUSLIM kaw mag Sabar kita karna ALLAH

O MUSLIM SUBAY KITA NIYU AWUN KABUGA’ PA ALLAH
IN QUR'AN GIFT KATU SIN ALLAH
HA ADLAW MAHULI IN SURAH (Chapters)!!!
HIPANGASUBU KATU BANG YUNU TA?!
{ha SURAH az Zukhruf 43:44 Anduh Kita'a!}

Mayta kita Dumungug Music NILA?!
Mayta Pila na Surah in Na Memorize ta?!
Sumagawa bang Kalangan Da,
In NA-Memorize ta hangka ALBUM na
Dugaing pa in composition ta!!!

NA TEETH mayta biyahan kaw mag bissara
Bukun ka tagna in ikaw yan Banda?!
In Agi hi TEETH isab kaniya:, in tagna yattu in kita awam pa
wayruun pangirab ko sin Shari'ah (sarah sin ALLAH)
Ha bihayaun mag tuyuh tuud kita
lumayu pa mga kabungsihan sin ALLAH
Bang in Music dih ta kaaniban, at least dih tana hi promote siya
Bang music dih ta katahanan at least manaabbiti kita subay sila
Dumungug Qur’an iban mamassa sin Sunnah

NAH MGA TAYMANGHUD Ku HA ISLAM,
Ampa in kasabunnalan!!!
Sambil mga way lagi KALANGAN
Yan ha lawum sin pangatayan!!
Misan ta kamu testingan!!
Kitaa ha hi sulat ku in kalangan
Ampa niu sugpatan!!!
Maka inu-inu san
100% niyu ini kugdanan!!!

Yari na in mga kalangan sugpati niyu kunu laung ta bihayan:

1. WHO LET'S THE DOGS ___?
2. OOPPS I DID IT _____?
3. KAYLANGAN KO'Y ____?
4. I'M LEAVING ON A ___ _____?
5. AND I DON'T WANA MISS A ______________________________!

Mahaba in yaun sawab mataas basa:-)

ANDUH HA BIAUN NAG INGATI NA
AYAT NA ISAB IN MEMORIZUN TA
IN QUR'AN UKABUN TA,
BANG KITA DIH MAKABASSA
MAGPAHINDU ATAWA MANGADJI BA!

KALU IN KABUHIANAN MA PINDA
BANG KITA MAG ANAD ANAD DA
O MUSLIM TUMTUMA IN JANJI SIN ALLAH
BANG KITA NIYU MAG TA’AT KANIA
TUNGBASAN NIYA KITA JANNAH!!!!

wasalaam..........

by: "TEETH"

" PAGPATUMTUM"

Assalamu Alaykum pakataymanghuran
yan kamu timatagad ha tiranan
yari ako dimara kaniyu sasallamatahan
bat aun isab makawah niyu pangadjian 
hambuk isab ini tarasul iban daman.

Bismillah ini hambuuk usul
naug daing ha Rasul,
Upat bangsa siyusul bat baran dih mahansul

kaisa kayu baran ayaw ta pasaran
mahunit bang taykuran maduwa in tukuran,

karuwa hangin nafas parayawun in kakumpas
bang dusa dih mapapas baran tantu maluppas,

katu tubig atay hadilun in kamatay
bang in nyawa manaytay
duun magantung bitay,

kaupat lupa nyawa ayaw magduwa ruwa
kailu hi ginhawa hibugit da hi nyawa,

ampa in upat inasil
mapatay way pagsisil
bang sumah in pikil
baran tantu kafir,

hangkan ta pagmuhutan
in ammal pagtuntutan
in dunya mahunit ta balikan.

di ku na ayatan bang aun way kimugdan
pabuntula niyu ra kuman
mga taymanghud ku ha Agama Islam
in tarasul yan piyag praktisan.

Amilhamja Nhur

"PATUMTUM SADJA"

Tagnaan namu' ha salam
Pa mga kiyakasihan sin Tuhan
Yari kami nagtarasul iban daman
Nagpatumtum sin kahalan.

Haunu na baha in naggugulal
Amuin mga sila bar-akkal
Subay kita niyu magpatampal
Ha supay maun katu' in pagkasi iban pagkilal.

Subay kita niyu bihaun magtagama
Magtuyu mag usaha
Mangadji in damikyan niya
Tumipun ha supaya pagpalidug sin agama,

Subay in paunahun humati sin hukuman 
Sin mga kasara't sara't sin agama islam
Misan dumatung in pagtibuuk hula' pag mahrupan
Di' maun katu' ta niyu in pag ug sin arta' iban baran,

Subay di' natu' lupahun
Hula Mindanao palindugun
Hukuman sin islam wajib in humukum
Ha hula natu' mapatarrang sin islam pagbahasahun.

Mga kataimanghuran sin kami
Amun sila namaug bugi
Sin kaislam subay maparuli
Paunun natu' in pagtibuuki.

Ayaw kita niyu magpikilan
Sin susungun natu' subay namna dayahan
Di' natu' da mara muwi in arta' natu' pa liyangan
Subay maun katu' in panibuuki ha pagpa intul sin hula natu' islam.

Ha waktu ini 
Paunun natu' in pagkiyasi-kiyasihi
Ha supay maun in pagtibuuki
Ha hula natu' supaya di' makaulong satru in magparuli.

Bukun kami nagkabtangan 
Sin mga kahalan natu' laung ta bihan
Sa' in kami laung ta nagpahimati sadja katu' katan
Ha supaya susungun aun daman sab gumuwa' magpalindug sin hula natu' islam.

Andu mga tuan mga rayang
Bukun maksud namu' magkabtangan
Ha supaya maiyan niya way sab biya' ha hambuuk taimanghud yan
Biya' magparuli naman sin mga kahalan.

Andu sab mga taimanghud namu'
Subay kita niyu magptuyu'
Hula' natu' muslimin pissuku' sin satru
Biya' makahansul in kahalan sin kaanakan natu'.

Hangkan in paunahun amuna in pag-eiman 
Misan maun katu' in manibuuki ha kaislam
Di' kita niyu magduwa ruwa misan in kaunan malawa dunya taikuran
Mamantayan ha pagbunu sabab sin pagpalindug sin kaislam.

Hangkan kami nagpahimati'
Sin kahalan natu' mga kakasi
Supaya maun in pagtibuuki
Ha hula' natu' magparuli.

Wa billahi taufiq wal hidaya't
Waba'ad assalamu alaykum wa rakhma't "ALLAH" wa baraka't…..

Jimhar Patarasa Tahil
MAY 01, 2010 ( Jumada-I 27, 1432) Sabtu
@11:33a.m(k.s.a)

Manga Ba'gu Tarasul

AWN PA BAHA’ LASA NIYU

Masa hapagjawaban,
Ilham bigla' nakapapikilan
Bongao hula' Lingkatan
Sakup sin Sultaniyya sin Sulu Darul Islam

Awn pa baha' lasa niyu?
In asubu daing ha atay ku
Kahalan sin hula magpaka andu' kailu
pasal baha' sin way piyagmahi natu'?

Andu' manga Tausug
Bangsa pilihan maisug
Ha bunu' di' maraug
Mayta' bang magmahi sin hula' masipug?

Andu' manga Bangsa Suluk
Aynaman kamu magtapuk
Bang yan bunnal kita niyu magbawgbug
Satru' di' san makatanhud

Andu' manga bangsa Pilihan
Mamaruli ha huling jaman
Bukun san aku in nagkabtangan
Sa' manga kaulamaan, kiyawa' haka hadisan

Karina kamu manga bangsa ku
Magsama-sama kita niyu dumuwaa
Kumuut sin bulsa, magpaguwa' hikahaddiya
Gumuwa' daing ha hula' hituk in dugu' nyawa!
Ha ngan Sin Allah Maha Assa

La Hawla Wala Quwwata illah Bilah!


Yazir Rajim 

-------------------------------

MAHUKAW NA AKU

Mahukaw na aku
Tagun Filipino
Karna' bukun bangsa ku
Atu sin kaapuan ku

Mahukaw na aku
Tagun Filipino
Karna' in sila magsasakutu
Ha Tuhan Umbul Satu

Mahukaw na aku
Tagun Filipino
Sabab in sila Panipu
Pungun nila tuud in Agama ku

Mahukaw na aku
Tagun Filipino
Nagsabab daing kanila
Nagkamundal mandil in bangsa ku

Malisu' na aku 
Tagun Filipino
Hula' ku tagna' jatu
Ha laum lima nila nahalu bilu

Masub pa kamu?
Tagun Filipino
Sin in bangsa yan panipu
Way kaingatan daing sin manghilu

Masub pa kamu?
Tagun Filipino
Sawkat na awn piso
Hipaghulat sin napsu

Masub pa kamu?
Tagun Filipino
Way niyu hadja nabistu
Hula, Bangsa iban agama
Lupusan nila daing kaniyu!

Yazir Rajim
Putik, Zamboanga City
25 April 2011, 3:10 PM

-------------------------------------


BANG AKU RA INI

Bang aku ra ini oh taymanghud ku
Ayaw mu hikasusa, ayaw mu hipaginu-inu
In aku ini miyurul hadja ha limpa'
sin manga tau giyugulal dupang
sin manga tau giyugulal way tagaran
sin manga tau giyugulal way kapusan

Pasal in iyupihan ku,
Bukun tau masub ha kunsum
Bukun tau masub sin dali'
Bukun tau masub pagbantugun

Bang aku ra ini oh kakasih ku
Biya' da kaymu in panayma'
Bang kaw bukun da mahuka'
Ha Tuhan Mahakutta'

Pasal in kabayaan sin Tagkabayaan
Amuna in magpataud sin sahaya jatti
Hipagbubu sin gusi
Ha isuk sin isuk bigi

Bang aku ra ini Oh maas ku
Ampuna man in pardusahan ku
Ilmu' jukup na hikasapaat ku kaymu
Dunya ahirat bangman kaw halaum hidayat

Pasal bang tungud pilak
Bakas kuna piyangayu' ha tagdapu sin Rahmat
Di' aku mabaya' magpasasat
Di' na aku mabaya' magsikat

Bang aku ra ini oh kamu kalasahan ku
Ay niyu na hikapikal
Bukun da aku mabingal
Timubu' hadja in pagmasukkal ha laum atay

Maapa niyu mayan aku..
Lugay sin pag-agad agad natu' ha dunya
Sibu' da hakalahil iban ha bukun lahil
Kalasahi niyu hadja aku, biya' sin lasa niyu ha baran niyu.. 

Yazir Rajim
Putik, Zamboanga City
3:36 PM. 25 April 2011

-----------------------


DAUG WALA’ KIYANANAMAN

Himublut hi Panglima Hassan sin Barung
Nagpatama' ha punglu sin satru'
Ha Bud Bagsak nagbunu'
Isug nila nakalandu'

Naubus sila hangka agaran
Sahid ha ngan sin Tuhan
Sin milikan piyagkanaman
Niyat in kabuhi' Panayaman

Panglima Hassan namantayan
Bukun karna' karupangan
Pamawgbug ha hula, bangsa iban agama
Di' sila mabaya' in satru makagiik ha hula' limaya

Dugu' nila way piyag-ug
Bat bangsa di' maraug
Indajinis lupa bangsa Sug in namawgbug
Bat kalimayahan sin hula' di' majugjug

Bihaun nakapakain na in umagad bangsa?
Way kiyasayuhan Filipino na in kiyatudjuhan
Sin manga panubu' gagandilan
Ha katas katan narupang!

La Hawla wala Quwwata illah Billah!

Halga' sin bangsa Sug
Ha katas diyaug
Filipino ra in piyanuk ha liug
Bangsa Sug naubus nalu'nud

Sari manga palanggungan
maraih in kaniyu bukun da karupangan
Dih hadja kamu makasandal sin kasigpitan
Misan in bangsa niyu kiyaragang, sin manga mangdurupang

Misan bihadtu ayaw kamu mainu-inu
Bangsa TAUSUG yan piyajajatu
Bat in manga kaanakan, iban kaapuan
Di' na makakinam sin kasigpitan, iban karukkaan

Ya Allah Kaymu ra in tatabangan di' maghundung!

Yazir Rajim
Putik, Zamboanga City
3:20 PM, 25 April 2011

------------------------------


TAU LABAY

Laung sin manga halul akkal
In kita ha dunya nanglabay-labay
bukun da kita kakkal
Ahirat in hula' sabunnal

Ampa in tau labay
Wayruun butangan kakkal
Way angan-angan makasukkal
Ha dunya sila mabiyal

Sipat sin tau labay
Kimita' sin katilibut hikasung akkal
Di' lumu'gum hapagdunya
Bat hikapikal kanila

In tau manglabay-labay
Wayruun hula', bay
Hawnu-hawnu sila makahundung
duun sila magparum

Kitaa ba in lingkat sin dunya
Malingkat daing sin napsu ammara
Awn san rahasiya' niya
Kiyaingatan sin imuntas ha babaw niya

Pagpahinang nakaw tau manglalabay-labay
Dunya ayaw hikapikal
Hinang hadja kaw pagmasukkal
bat kananaman in limu' labi daing ha sukal

Yazir Rajim
7:18 AM, 26 April 2011
Putik Zamboanga City

-------------------------
WAY NAGSAKSI’

In 
Katan
ini
piyalabayan
hadja
ha katan
Iypun 
sin Tuhan
labi na
in Kakasih Nya
matuyu'
maglunglung
mati'but
magbaut
bat atay
tumutut
ha daakan
sin Tuhan
ayaw mu
tuud angan-angana
kaymu in ginhawa
bat dakaw
di' mahansul
hapagabut sin masa

way nagsaksi
ya kaw kakasi
tuput da 
in Tagkapunyahan
sin Dum iban adlaw
Ayaw kaw magpasaula-ula
bat kaw di' mabinasa
atura kunu'
in ginhawa yan
bang awn duun
suku' mu?

La Hawla Wala Quwwata Illah Billah! Ikaw ra Ya ALLAH!

Pahuguta
in panindug ini
hapagpalindugan
sin kasabunnalan
daing naman
ha baran
dakpak pa hula'
Kalasahan.
Agama Mu
Sampurna' na
daing pa ha awal jaman
wala na kiyapindahan

Saksi in Nagsaksi
Kabuhi' way dautun
Tuput magbalik
Pa Tag-Ipun.

Gusi.....Gusi....

Tuyuan tuud lagun
Bat nyawa di' magsusun...


Yazir Rajim
10:06 PM, 28 April 2011
Putik, Zamboanga City

-----------------------------


MAYNAAT INI

Gabun namutusi sin langit
Kiyatabunan in awan bilu
bukun nagmaksuri hipanambul
Rahmat sin Tuhan piyanaug
pa katan nagdara kabuhi'

Adlaw ini, malasig in ginhawa
masi pa ha tagaran sin magdaratung-datung
masi pa ha saksian sin katan lugi' untung
Alhamdulillah, wala' pa nabulat in mata
Pa kasabunnalan sin kita rahasiya' Niya

Ulangig sin Subuh nakadihil sahaya
pa tiyap banyawa naggugulal Mu'min
Nakarayaw pananaman ha atay Salim
Nakasugpat pangannal pa tau di' magpuputing
Maraih ini sipat na sin sulga'?

Ya kaw nyawa liyaung...nakabatuk na kaw?
Pa gi'tungan dan hipu' sin kasanyangan
Pa laud sin rahmat iban ni'mat
Pa ginlupaan sawasa' wayruun luun dusta'
Pa isuk sin jamlud iban intan lingkat way salian

Ya kaw nagaatay batu...subay ra kaw maalistu
Maglanu' sin ginhawa, daing ha katan dusa
Magparayaw sin niyat, hi ig in pagmasusa
Palunuka in atay yan sin Qur'an Mulliya
Masiya-siya ay kita, dunya ini hawpu' da

Himati' in ginhawa ha bayta' sin Mursyid

Ya kamu murid Kalasahan
Adlaw ini nakabalik na kamu pa Tuhan niyu
Ampa nasampulna' in pagtawbat
Ha waktu kamu nagpabi-at
Sin awal kajari imingat
Lutu' niyu pa ahirat
Amunayan in hinang hikamumpaat
daing ha dunya, kubul sambil pa sirat
ay kamu tuud malipat, dunya mataud sasat

Pangamdus kamu ha Ilmu' iyaagaran hinang marayaw
Ay kamu mangandul ha mag-ilmu' way paragbus
Biya' ra sa kamu yan sin magtanum 
Bang bigi di' hi tanum, tantu way tuud untung

Ayaw kamu malipat..
Ay mangandul ha kawasa iban pilak
In yan mahinang sasat, bang kamu way pilasat

Maynaat ini..ibuhan adlaw na in liyabayan
Bayta' yan pagkatumtuman nahinang padduman
Isut paman awn pamintangan
Sin tau ha Indaginislangan

Yazir Rajim
7:11 AM, 29 April 2011
Putik, Zamboanga City

----------------------------

INGATA

Aykaw maghuwat hat hadja magbatbat
Ingata in biyatbat mu
Iban sin ginhawa mu
Iban sin tiyaykuran mu
Iban sin sungun mu
Iban sin karayawan mu
Iban sin kangian mu
Pa rayawa kaul piil mu
Bat di' malarak hinang mu
Bat Ilmu' manaug kaymu
Bat Tuhan kaingatan mu
Bat Rasul kakilahan mu

Kakasi...
Amuyan in bautan sin kamaasan
Piyamandu' sin kaguruhan
Panubu' sin Junjungan

Yazir Rajim
7:29 AM
Putik, Zamboanga City

-------------------------


DUM NA ISAB

Hangpu' tagduwa kajam limabay
Mataud jasad nasalay
Mataud bardusa dimayaw
Mataud da isab masi hiyahanggaw
Kunsum unu baha' in hikarayaw?

Dum na isab in hansipak sin dunya
Katilibut tigidlum, waktu hipaghahanung
Bituun gimaib, maraih laud maalun
Dum ini hinnuk, maraw hipagtumtum
Pa Tuhan Tag-ipun Pa Nabi sasanjungun

Ya Allah bang awn pa kabuhi' ha jasad ini ha adlaw kunsum
Pa tattapa kami ha rida' iban ulung mu.

Yazir Rajim
8:58, 29 April 2011
Putik Zamboanga City

-------------------


KABUHI’ DUNYA

Simusul-susul kami iban kakasi
Nakaratung kami pa takut hinang sin nasrani
Indajinis lupa manusiya' matagi
Magpahayang-pahayang kamawmuhan sila di

Bang sumadlup na in suga
Manusiya' ha daira maghuru-huru na
Dagangan kajinisan makalambang mata
Subay mataud pulag-pulag ha laum bulsa

Paseo...

Kasusuwakan sin mata, karna' mataud idda-idda
Kalabbiyan sin kabuhi' dunya
Bata, maas didtu magpaig susa
Magpahagpay-pahagpay bang awn luun sin bulsa

Yazir Rajim
8:52 AM
Putik, Zamboanga City

---------------------


SALAM IBAN KASILASA

sanglit pa Tuhan iban pamudji
salawat iban salam pa Nabiy
salam mga lundang kakasi
magsukul tuan Jimhar ha panaabiti.

malingkat isab palipat natu' yan
mataud hika talik iban kapanayulan
timata' sadja ini nangdasang-dasang
timukbal sin salam kasila pakatan.

mashaAllah mataud taymanghud ku
landu' malingkat in mga tarasul niyu
makug makuyag landu' in atay ku
hambuuk ini tiranan sin pag patum-tum natu'.

in salingkat-lingkat tarasul pasal pag agama
naka pamahagi' nakaw sin mattan kasilasa
awun pa karayawan mu dayng ha Tuhan ta
di' pakaw luugan iban di' masayang in waktu ta.

taymanghud halgai tuud  in waktu mu
ha adlaw mahuli asubuhun kaw sin Tuhan mu
bang unu in nahinang mu ha free time mu
iban unu in nahinang mu ha katihabaan sin ummul mu.

piyapanjari kitaniyu karna' mag ibadat pa Tuhan
in kahalan bihaun mataud natuud kasasawan
bang kaw bukun busy ha hinang paldaakan
tantu busy kaw ha way kapus paiddahan atawa ha kadaruhakaan.

hi lyn natu' ha hal sin  pag agama
andu' ayaw natu' akkal akkalun sadja
subay tuud awun dalil pangamdusan ta
mahunit in maka panglaung kita ha pagkahi ta.

bang hal ibadat  in pagbitsarahan
subay awun dalil hadith iban Qur'an
supaya in ibadat mu taymaun sin Tuhan
umupi ha pamandu' sin Nabiy junjungan.

mangayu' aku kaniyu kamaapan
bang upama awun kiyasaplahan
andu' pag maapan dakuman
mag anad kitaniyu magad ha sunnat iban mag ikhlas pa Tuhan.

salam kasilasa kaniyu katan.... :)

Abu Al-Ansariy Tirmidhi

--------------------------

BANGSA NAPUNUNG?

Nanandaw tandaw kami sin kapuan Sug
Tungkapitu kulang kahadilan taymanghud
Agiut sin gumi kami natanhug
Ha guguwaan mata suga hula' nabantug

Biyantug in Tausug "Bangsa Maisug"
Nagbunu' tahunan sin satru' wala' diyaug
Bihaun masa bang kaw umatud
Siki-lima nila sintak nalarut na in isug

Isug biyadiin in pagbahasahun?
Amuka magda sinapang way paghundung
Ibut pa Tuhan in jawab bukun
Magmahi sin kapatut in subay palukun

Kapatut sin Tausug masi-masi
Nagbuta-buta panagnaan sambil nalawa' tagi
Unuhun muna in kusug sin Maggi Pilipin iban Jollibee
Larakun in katan daing ha laum bat wayna magmahi

Daing ha kakaun in Tausug naruwag?
Liyalassun dum adlaw sin TV way paghad
Hangkan sa in addat biya' na kan Juan Tamad
Sambil dahan bissara sin Tagalog tuy na iyagad

Ampa nakaw bantugan sin indajinis
Kabuhianan bukun tattap magdagbus ha pais
Di' kaw pantalunan bang bukun CK iban GUESS
Amuyan kunu' in panamung sin manga Elite?

Pagsadlup sin suga mamanaw-panaw
Iban sasakatan mahalga' baynat sin pangustaw
Tumudju pa Karaoke iban diskuhan laung muyan lutaw
Lingi' na madtu mari maglawag day-day

Manga bangsa napunung!!!
Wayna pagirup sin susungun
Misan bangsa nabinasa bangman sila nahaun
Misan da makurustiyan in anak apu' agad nila ra piun

Pag-kadtu mari nahadja kamu manga way susa
Ha kasigpit sin bangsa mataud da in mabinasa
Wayra pagpi' lupa walna'
Hisiyu-siyu in masanyang ha dunya, di' matantu ha adlaw gana-gana

Yazir Rajim
Sandakan
10:16 PM, 9 May 2011

--------------------


SALUGAY AWN

Magmaaruy sin kasigpitan
Maglalawag hinang
Mangangayu' siyn ha ran
Mamuting ha katan
Magdaragang sin baran
Magtutulak pa kalayuan
Magkadtu mari magtaraan
Magtapuk sumud pa hula kalasahan
Magtataud in way nakasud pakaiskulan
Maglalayu' daing ha pag-agamahan
Magduruhun in pagbunu' hakagimbahan
Masi-masi in pagkidnap for ransom
Magakkal sin ginhawa baran
Maghithit sin syabu iban magkarupangan
Mangatu ha maas iban nalawa' na ha bautan
Magduruhun in lummi' sin kahulaan

Tanda' yan manga taymanghud!
In hula' natu' bukun masanyang

Tanda' yan manga taymanghud!
Subay kitaniyu makapi' Sultan

Tanda' yan manga taymanghud!
Subay ARMM iban Pilipin Butasan

Tanda' yan manga taymanghud!
Subay natu' hibalik in umagad kaIslam

Tanda yan manga taymanghud!
In pagkasilasa subay mahinang tindugan sin katan

Salugay awn pa di' makatayma' sin Pagsultan!
Tantuha niyu magduruhun pa daing hayan in katan...

Mayta' unu in awn ha nakura' bihan?
Amunasan in pagbahasahun Lambung sin Tuhan

Yazir Rajim
Sandakan
10:28 PM, 9 May 2011

---------------------


LANAB SIN KABUHI’

Mabaya' mu kananaman in lanab sin kabuhi'?
dasuki in atay mu sin kabuga' pa Tuhan
Lurupa in laud sin kabuhi'
Lawaga in mussa intan ha laum niya
wala' dayan nalawa' daing kaymu
Yanda mimikit, asal awal daan kiyalukis
lisu' hadja in nakahinang taming
iban paghuwat-huwat mapuas daing Kaniya
iban pagsaula-ula mu sin way kapatut mu

Nahapung kaw?

Agsu' kaw pa tau nakabatuk na sin lanab
Dih ra sakawyan pagtapukan 
bang in kaawnan mu ihlas sarta' mabaya' magtawbat

Lawaga...lawaga in lanab sin kabuhi'

Wala' duun nakabutang hakalahil
In yan lambung hadja sin ha laum 
amun kakkal way hugnaan niya..

Lawaga!

Yazir Rajim
11:57, 10 May 2011
Sandakan

--------------------


PANGAYU’ KAW

Ya kaw ipun sin Allah
Nakasayu rakakaw sin way pagbaya' mu?

Ya kaw ipun sin Allah
Nakaingat dakakaw sin Way ut mu Kaniya?

Ya kaw ipun sin Allah
Hisiyu tuud in hiyuhuwat-huwat mu di ha dunya ini?
Amuka in alta', kawasa iban kakaingat biyus kaymu?
Atawa huwat-huwat kaw pasal sin mataud asu kampung mu?

Hambuuk adlaw kananaman mura in katan hiyuwat-huwat mu
Di' da makatabang kaymu
Ha waktu kaw maglagi tatabangan ha laum kasigpitan
Ha waktu kaw duun na ha pamandangan naja'...

Pangayu' kaw! pa Tuhan Rabbul Izzati..
Ayaw kaw mangayu' ha way kusug
Pangayu' kaw ha Tagdapu sin ridziki', Tagdapu sin kabuhi'
In ikaw ha dunya ini, upamakun hadja lambung

Pangayu' mu tallang taluas Kaniya
Parayawa in kalakkuan iban hinang mu
Bat in katan magsaruun duun
Ha waktu kaangangkat sin duwa lima mu

Yazir Rajim
12:32 PM, 10 May 2011
Sandakan

-----------------


BANGSA KU

Wahai Bangsa ku
Bunnal da baha' in lasa ini
Di' na magduhung maghuna'-huna'
Sa' na hadja hi uwi' pa Tuhan in mukarna'

Masa sin ginhawa ha higad buhangin
Nakasilawak in jantung ini
Pa Tuhan namaluk
Atay landu' najugjug

Katu' sin luha ha higad daplakan
Suwara wa' simandal simabtan
Ya Allah tukbalan na in daraugan 
Pa bangsa hipu' sin kasusahan

Bangsa Sug magkadtu mari
Lumag sin hikatanam ha hula' kandi
Misan in hantang biya' ipun kaagi
Masi-masi ra matagi mari [Sabah]

Bang hadja kita' sin taymanghud yaun
Di' sayaun subay naman pasayuhun
Hal sin bangsa subay ayuputun
Bat dumayaw tanam misan nagduruhung

Bang hadja kiyananaman sin taymanghud yaun
In tangis sin anak bata' ha taas laud tigidlum
Di' saun siya sumandal, imiyan kari nakamu 
Bangsa natu' subay hawnun

Bang kaw mabaya' sumulay
Kimita' sin jimatu ha akkal
Daing ha Bongao pa Semporna' kadtu kaw
Bat kaw kahinduan, maig duun kaymu in hukaw

Mamanuk, hambuuk pu ha Lupa' Sug
Nakaiyan ma, "landu' tuwi' in lingkat sin hiyuhulaan mu ini", wahai maas usug
Bang hadja in ipun ini makagaus
Misan sakatan hat banug mari ra magbalik umubug

Unuhun tuan sa' ini lumatun
Magsugpat naman sin hapun
Kalu bangsa ini mahawun
Daing ha laum kahapung

Kapuan Sug iyuntas sin ginhawa
Nagaagad in hangka bangsa
Himahalli' ha makawasa
Malaingkan hula' tara

Mabuga' tuud in bangsa ini mabinasa
Sa' di' mabaya' magpabinasa ha ngan sin bangsa
Bat susungun sumawa
Anak apu' di' na mabiya' kanila

Wahai bangsa Gagandilan
Kasipugan mu sangunan
Aynaman magpaingatan
Fitna ay magabjan

Tukuhun natu' pagsama-samahan
Bangsa subay di' pasaran
Hula' ini ayaran Agama in salakan
Pamarinta Sultan subay hibalik pa Kapuan

Ayaw nakaw imiiyan
Yanna isab in magSultan
Magdupang nasa isab yan
Mataud na isab kaakkalan

Ay kaw taymanghud malaung
Sambil magpahinang manghukum
Bang bukun da biya' sin duun
Hula' natu' mahunit na kawaun

Bang pagSultan di' hinangun
Unu Republic in hi sangun?
Atawa magpapatay na ha Autonomy magpahinang Ipun
Ha manga tau Luzon in kaingatan manglassun

Bang hadja in bangsa ini piyaruli nila
Tanda' jinisan na, bangsa ta pa in imuulin kawasa
Sayu kaw taymanghud bang "Democracy" ra
In guwa' natu' katan bawbinasa

Di' paka kaw lumuga sin jimatu
Bangsa Sug nabinasa
Hula' liyalakaban na hadja
Kamiskin naglaluwasa

Mayta' nabuta' na in atay yan taymanghud?
Lanu' lanu'i ba sin jikiran tudju laksa' in taud
Kalu ilham sin Tuhan kaymu sumud
Lasaha in bangsa, hula' masi yanda, Agama wayra napinda

Yazir Rajim
2:48 PM
Sandakan

-----------


TINDUG KAW MAGPARAYAW!

Anak Bangsa
Aykaw masusa
Bangsa mu Mulliya
Tugila' ha dunya

Bangun kaw!
Tindug kaw!
Panaw kaw!
Hinang kaw!

Unu-unu na in hikarayaw
Ayaw hadja kaw maghukaw
Bang masi mataud mangustaw
Tindug kaw magparayaw

Anak Bangsa
Kabuhi di' masiya-siya
Hula' in hipagsusa
Tanda' baha' kasilasa?

Luuni in pikilan
Pagpahinang kaw ilmawan
Bat satru' di' magkanam
Ha hula' magsaytan

Ipusi!
Lanui!
Sandali!
Saksii!

In katan lummi' nakapa mata mu
Bukun dayan kakkal
Dunya ini hawpu' da
Karayawan da in tumayimbabaw!

Yazir Rajim
6:47 AM, 11 May 2011
Sandakan

TARASUL IBAN DAMAN

Sulat ini Tarasul
madtu mari hilunsul
dungugun makahansul
Aturan sin mga bata iskul
Bissmillah in nakara sin hurup idagam
in malaikat kiyugan
Biraddali ha pag-tagaran ha
sulgah ha pag-a'garan
Hirrahman Hirraheem
in mangadji aun ih'tirad in mga
malaikat Landuh makuyag
in mga biraddali nag-tatagad
ha Sulga nag-aagad
bang mangadji way kalima
in malaikat mag-aama
siksa sin TUHAN tiyatagama
ha Narka Salama-lama
bissmillah in mangadji awn hakikat
in mga malaikat nag mawpakkat
Sulgah Walung kapangkat
didtu kita niyu makasakat
Alhamdulillahi Rabbul aalameen
subay maaripatun natu
in mahaba, haupu in nagbunuh,
nagsabtuh hambuuk sadja
in maad mabugtuh Narka
Jahannam in datungan natuh
Tammat na in Tarasul way nah ika ruhul